Méadair Thraidisiúnta – Fabhtanna leis an gClog Ama a Réiteach

D’fhéadfadh ESB Networks fadhb a d’fhéadfadh a bheith ann le méadar traidisiúnta nó trealamh cloig ama a aithint ar bhealaí éagsúla:

• Déanfaidh Léitheoir Méadair nó Teicneoir ar Conradh de chuid ESB Networks iniúchadh ó amharc ar an méadar agus fadhb a thuairisciú
• Aithneofar fadhb a bheith ann nuair a dhéanfar léamh méadair a bhailíochtú
• Aithneofar fadhb a bheith ann mar thoradh ar anailís déanta ag ESB Networks nó an Soláthraí 

Féadfaidh custaiméirí fadhb a d’fhéadfadh a bheith ann a aithint. Má chreideann tú go bhféadfadh fadhb a bheith ag baint leis an méadar agus/nó an clog ama, ba chóir duit dul i dteagmháil le do sholáthraí a dhéanfaidh an fhadhb a d’fhéadfadh a bheith ann a chur in iúl do ESB Networks i d’ainm.

Mar sin féin, má bhíonn tú imníoch ó thaobh sábháilteachta de i gcás do mhéadair, ba chóir duit an fhadhb a thuairisciú go díreach do ESB Networks ar an uimhir éigeandála1800 372 999

Má mheastar go bhféadfadh fadhb a bheith ann, déanfaidh ESB Networks an fhadhb a fhiosrú. Mar chuid den obair sin, b’fhéidir go mbeadh cuairt ar láithreán an mhéadair chun oibreacha deisiúcháin a dhéanamh nó chun an méadar agus/nó clog ama a athsholáthar. Gach uair a dhéantar trealamh a athsholáthar, coinníonn ESB Networks taifead de. Má chuirtear méadar nua isteach mar gheall ar an gcuairt ar an láthair, cuirfear soláthraí cláraithe an chustaiméara a bhfuil an MPRN sin aige ar an eolas. 

Tar éis dúinn an fhadhb leis an méadar a réiteach, déanfaidh ESB Networks athbhreithniú ar stair an ídithe agus measúnú le fáil amach ar chóir an t-ídiú stairiúil a choigeartú. Má tá aon choigeartú le déanamh, déanfaimid anailís ar an tomhaltas stairiúil mar aon le haon fhaisnéis eile a bheidh ar fáil chun tréimhse lochtach a dhéanamh amach. As sin, gheofar meastachán bunaidh ar an ídiú bunaithe ar phatrúin stairiúla ídithe. In amanna, ní bheifear in ann an fhaisnéis stairiúil faoin ídiú a úsáid chun coigeartú ídithe a ríomh. D'fhéadfadh a leithéid teacht chun cinn mura mbíonn sé soiléir cén dáta ar teipeadh ar an trealamh. Dá dtarlódh sé sin, d’fhéadfadh sé go n-iarrfaí ar ESB Networks sonraí ídithe ón méadar agus/nó ón gclog ama nua a úsáid chun an coigeartú a ríomh.

Má ríomhtar go bhfuil coigeartú creidmheasa le tabhairt do chustaiméir, déanfar na haonaid mheasta tosaigh a eisiúint don soláthraí cláraithe reatha i gcomhréir leis na Rialacha maidir le Cur chun Feidhme Ghrúpa Taraife DUoS:. Sa chás go raibh an custaiméir cláraithe le soláthraí/soláthraithe eile le linn na tréimhse atá i gceist, cuirfear an aisíocaíocht iomlán in iúl don soláthraí cláraithe reatha. Faoi Alt 11 den Acht um Reacht na dTréimhsí, 1957, beidh feidhm le haon aisíoc go ceann sé bliana ar a mhéad ón dáta a réiteofar an fhadhb leis an méadrú. 

Is féidir leis an soláthraí cláraithe reatha tuilleadh plé a dhéanamh le ESB Networks thar ceann an chustaiméara maidir leis an ríomh tosaigh. Is féidir leis an gcustaiméir faisnéis bhreise a chur ar fáil, tríd an soláthraí, maidir le patrúin ídithe fuinnimh a d’fhéadfadh ESB Networks a mheas chun teacht ar an gcoigeartú a theastaíonn. 

Ní dhéanfaidh ESB Networks coigeartú siarghabhálach ar an gcuntas i gcás ina ríomhtar go mbeadh muirear breise le híoc. Mar sin féin, ba cheart do chustaiméirí a bheith ar an eolas go bhféadfadh méadú teacht ar an ídiú fuinnimh arna thaifeadadh ag an méadar agus/nó clog ama nuair a dhéanfar an fhadhb leis an méadar a réiteach. Mar sin, d’fhéadfadh sé go dtiocfadh ardú ar an gcostas sna billí a gheobhaidh siad ón soláthraí.