Tuilleadh eolais maidir le Méadair Chliste agus Sonraí

Murab ionann agus méadair thraidisiúnta, nach ndearna ach ídiú leictreachais a thaifeadadh, taifeadfaidh do mhéadar cliste sonraí faoin méid leictreachais a úsáideann tú, aon leictreachas a dhéantar a easpórtáil chuig an eangach, mar aon le tarluithe, foláirimh agus sonraí ionstraimíochta a bhaineann leis an soláthar cumhachta i d’áitreabh. Tá míniú níos mionsonraithe ar gach catagóir sonraí seo thíos. 

Gach lá, déanfaidh an méadar taifeadadh den leictreachas a úsáideadh agus a easpórtáladh sna 24 uair an chloig roimhe sin. Sonraí Tabhaill a thugtar air sin. 

Déanfaidh an méadar miondealú níos mionsonraithe den leictreachas a úsáidtear agus a easpórtáiltear a thaifeadadh, tréimhsí suas le 30 nóiméad a bhíonn i gceist leis sin. Sonraí Eatraimh a thugtar air sin. Cuirtear san áireamh taifead den leictreachas a úsáidtear le linn na dtréimhsí lae, oíche agus buaicéilimh. Bíonn an tréimhse lae ar siúl idir 8 r.n. agus 11 i.n., gan an tréimhse bhuaicéilimh, idir 5 i.n. agus 7 i.n., a áireamh. Is idir 11i.n. agus 8 r.n. a bhíonn an tréimhse oíche ar siúl. 

Déanann an méadar faisnéis dhiagnóiseach a thaifeadadh faoin méadar féin lena chinntiú go bhfuil an méadar ag feidhmiú mar is ceart. Sonraí Teagmhais a thugtar air sin. 

Chomh maith leis sin, tá an méadar in ann méadracht dhiagnóiseach a thaifeadadh a bhaineann le cáilíocht na cumhachta sa líonra gar don áitreabh a bhfuil sé suiteáilte ann.  Fágann méadracht mar sin go mbíonn ESB Networks in ann fadhbanna soláthair arna dtuairisciú ag custaiméirí a aithint go cianda (ísealvoltas, mar shampla) gan aon chall a bheith ann cuairt ó Theicneoir Líonra a shocrú ná trealamh chun an fhadhb a aithint a shuiteáil go sealadach ar an láthair. Sonraí Ionstraimíochta a thugtar air sin. 

Tusa a dhéanfaidh an cinneadh an seolfaidh an méadar Sonraí Tabhaill nó Sonraí Eatraimh chuig ESB Networks ós rud é go mbeidh an méid sin bunaithe ar an saghas taraife nó plean leictreachais ón soláthraí leictreachais atá roghnaithe agat. Tá míniú air seo thíos: 

• Beag beann ar an soláthraí leictreachais atá agat agus ar an taraif nó plean atá roghnaithe agat, cuirfidh an méadar sonraí chuig MDMS ESB Networks uair sa lá (thart ar mheán oíche, de ghnáth) maidir leis an méid iomlán leictreachais a úsáideadh (agus a easpórtáladh chun na heangaí, más bainteach) sna 24 uair an chloig roimhe sin. Sonraí Tabhaill a thugtar ar na sonraí sin.  
• Má tá taraif nó plean roghnaithe agat agus é mar pháirt den taraif nó plean sin go gcuirfear sonraí úsáide leictreachais chuig an soláthraí don úsáid lae, oíche agus sna tréimhsí buaicéilimh, cuirfear na sonraí sin ón méadar uair sa lá chuig MDMS ESB Networks. Sonraí Tabhaill de chineál eile atá ansin. 
• Má tá taraif nó plean roghnaithe agat ar gá sonraí úsáide leictreachais gach 30 nóiméad (agus an leictreachas a easpórtáiltear chun na heangaí, más bainteach) a chur chuig an soláthraí, cuirfear na sonraí sin ón méadar chuig MDMS ESB Networks gach dhá uair an chloig. Sonraí Eatraimh a thugtar ar na sonraí sin. 
  

Ba chóir a thabhairt ar aird nach seolfar ach a laghad sonraí agus is féidir ón méadar chuig MDMS le go mbeidh an soláthraí in ann bille a ghearradh ort i gcomhréir leis an taraif nó plean atá roghnaithe agat. 
 

Ar deireadh, déanfaidh an méadar cliste é féin a ghníomhachtú thart ar gach dhá uair an chloig leis an tsláine agus an nasc idir é féin agus an líonra cumarsáide a sheiceáil. Cuirfear eolas faoi aon fhadhbanna a bhíonn ann chuig an MDMS. Sonraí Ócáide a thugtar ar na sonraí sin. 

Déanann méadair chliste cumarsáid go cianda le ESB Networks ar líonra móibíleach slán. Baintear feidhm as teicneolaíocht mar an teicneolaíocht a úsáidtear chun teachtaireachtaí téacs a sheoladh. Déanfaidh do mhéadar rud a chruthú a bheidh mar an gcéanna le teachtaireacht téacs chriptithe agus a sheoladh chuig córas TF a dtugtar córas ceannmhoil air. Stórálfar na sonraí go léir a bhaileofar ón méadar go slán sábháilte ar Chóras Bainistíochta Sonraí Méadair (MDMS), arna bhainistiú agus arna oibriú ag ESB Networks.  Ní bheidh rochtain ach ag ESB Networks ar na sonraí ar do mhéadar cliste. Rochtain shrianta atá i gceist le rochtain ar na sonraí atá sa chóras bainistíochta sonraí méadair. 

Gach lá, thart ar mheán oíche de ghnáth, úsáidfidh do mhéadar líonra móibíleach slán chun sonraí a chur chuig ESB Networks faoin leictreachas a úsáideadh agus a easpórtáladh sna 24 uair an chloig roimhe sin. Má tá plean nó taraif roghnaithe agat a bhfuil sé mar chuid de gur gá sonraí maidir le hídiú leictreachais a chur chuig an soláthraí don lá, oíche agus tréimhsí buaicéilimh, seolfar na sonraí sin ón méadar ar mheán oíche chomh maith. 

Déanfaidh an méadar cliste é féin a ghníomhachtú thart ar gach dhá uair an chloig leis an tsláine agus an nasc idir é féin agus an líonra móibíleach a sheiceáil. Seolfar sonraí maidir le haon leictreachas a easpórtáladh chun an líonra. Má thagtar ar aon fhadhbanna leis an méadar, déanfar teachtaireacht téacs chriptithe eile a chruthú agus seolfar sonraí faoi na fadhbanna sin chuig ESB Networks. 

Má tá plean nó taraif roghnaithe agat a bhfuil sé mar chuid de gur gá sonraí maidir le hídiú leictreachais gach 30 nóiméad a chur chuig an soláthraí, seolfar na sonraí sin ón méadar chuig MDMS ESB Networks gach dhá uair an chloig chomh maith. 
Tugtar míniú ar an méid sin sa chéad chuid eile. 

Níl cead ag ESB Networks sonraí ón méadar cliste arna mbailiú ag an méadar a úsáid ach chun na gcríoch a shonraítear sa Cheadúnas mar Oibreoir an Chórais Dáileacháin nó mar a shonraítear a mhalairt de réir dlí. Áirítear leis sin an méid seo a leanas: 

• an Clár Náisiúnta um Méadrú Cliste a cheapadh ar ardleibhéal agus a chur i bhfeidhm ar dhóigh a shásóidh riachtanais an chláir agus oibleagáidí faoin dlí náisiúnta agus Eorpach, de réir mar atá ordaithe ag an gCoimisiún um Rialáil Fóntas.; 
• an tArd-Infreastruchtúr Méadraithe arna fhorbairt ag ESB Networks chun tacú le feidhmiú an Chláir (an Córas Bainistíochta Sonraí Méadair san áireamh) a bhunú agus a choimisiúnú; 
• an tArd-Infreastruchtúr Méadraithe a fheidhmiú sa dóigh is go mbeifear in ann seirbhísí cliste a sholáthar don mhargadh miondíola leictreachais. Áirítear leis sin:
   
  
  • sonraí infheidhme maidir le hídiú fuinnimh (sonraí tabhaill agus/nó eatraimh) a thabhairt don soláthraí atá agat le gur féidir billí beachta tráthúla a chur ar fáil don taraif nó plean atá agat leo; 
  • próisis a bhaineann leis an margadh miondíola leictreachais a chur i gcrích go tráthúil beacht ar nós soláthraí a athrú agus eintiteas dlíthiúil a athrú (bogadh áitribh), ar féidir iad siúd a lorg go cúlghabhálach; 
  • leibhéal nasctha cumarsáide an mhéadair a dhéanamh amach chun tacú le tairiscint seirbhíse an tsoláthraí do chustaiméirí; 
  • é a dhéanamh níos éasca táillí a ríomh as an gcóras a úsáid; agus
  • tacú le socrú an mhargaidh mórdhíola leictreachais. 

San am atá le teacht, meastar go mbeidh ar ESB Networks sonraí méadraithe um ídiú fuinnimh a bhailiú agus a phróiseáil chun críocha breise, mar shampla, an pacáiste “Fuinneamh Glan do gach Eorpach” a chur ar fáil, an eangach náisiúnta leictreachais a dhícharbónú agus teas agus iompar a leictriú. Ní dhéanfar sonraí pearsanta a phróiseáil chun na gcríoch sin nó chun críoch eile ach amháin i gcás ina bhfuil bunús dlí ag ESB Networks lena leithéid a dhéanamh faoi na dlíthe príobháideachta sonraí is infheidhme. 

Ní bhíonn fáil ach ag ESB Networks ar do mhéadar cliste agus ar na sonraí atá ann. Tá roinnt bealaí againn lena chinntiú go mbeidh do chuid sonraí slán. Déantar rochtain a rialú go géar agus bainimid feidhm as sraitheanna iomadúla cibearshlándála ar na córais TF agus próisis ghnó atá againn.  Bíonn cárta SIM leabaithe i ngach méadar cliste, mar shampla, agus tá prótacail slándála i bhfeidhm lena chinntiú nach mbíonn ach cártaí SIM ceadaithe in ann a bheith mar chuid den líonra móibíleach slán criptithe a úsáideann méadair chliste chun cumarsáid a dhéanamh leis an Ard-Infreastruchtúr Méadraithe. Déanann Three Ireland Ltd an líonra sin a fheidhmiú thar ceann ESB Networks. 

Tá tástáil neamhspleách déanta, ó thaobh na cibearshlándála de, ar na cineálacha faoi leith de mhéadair chliste atá á suiteáil ag ESB Networks. Tá an tArd-Infreastruchtúr Méadraithe agus córais TF eile cosanta ag córais slándála thionscalchaighdeánacha, ballaí dóiteáin ina measc. Déantar tástáil agus athbhreithniú rialta neamhspleách ar an méadar agus ar na socruithe slándála seo. 

Is féidir na luachanna tabhaill a léamh ar do mhéadar. Tá físeán faoin gcaoi le do mhéadar a léamh ar fáil anseo

Maidir le sonraí ó mhéadair chliste (i) a bhailíonn méadair chliste agus (ii) a easpórtáiltear chuig an Ard-Infreastruchtúr Méadraithe agus a stóráiltear sa Chórais Bainistíochta Sonraí Méadair, ní choinníonn ESB Networks na sonraí sin ach don tréimhse is lú agus is gá le gur féidir le ESB Networks a oibleagáidí dlíthiúla i dtaobh na sonraí sin a chomhlíonadh. 
 

Coinnítear sonraí maidir leis an úsáid leictreachais ar feadh seacht mbliana chun cloí leis an gCód um Méadrú atá cheana ann. Cód é sin atá eisithe ag an gCoimisiún um Rialáil Fóntas ar gá do ESB Networks (agus soláthraithe leictreachais) cloí leis. Ba chóir a thabhairt faoi deara nach mbíonn feidhm leis an tréimhse choinneála seo ach amháin i gcás sonraí ídithe a uaslódáiltear ó do mhéadar cliste chuig an Ard-Infreastruchtúr Méadraithe lena n-úsáid chun billeáil don chustaiméir, muirir as úsáid an chórais agus réiteach mórdhíola a ríomh. Úsáidtear na sonraí seo chomh maith le ceisteanna agus gearáin stairiúla um méadrú ó chustaiméirí a réiteach. Gné thábhachtach den Chlár Náisiúnta um Méadrú Cliste atá ansin. 

Déanann an méadar cliste féin ídiú leictreachais a thaifeadadh gach leathuair an chloig. Ní easpórtáiltear na sonraí eatraimh sin chuig Córas Bainistíochta Sonraí Méadair (MDMS) ESB Networks ach nuair is gá a dhéanamh, agus a mhinice gur gá, bunaithe ar iarratas ón soláthraí leictreachais atá agat bunaithe ar an taraif nó plean atá agat. I gcás sonraí ídithe fuinnimh arna dtaifeadadh ag an méadar cliste é féin ach nach gá iad a easpórtáil chuig an MDMS don bhille, déanfaidh an méadar na sonraí sin a fhorscríobh go huathoibríoch taobh istigh de 350 lá ar an méad. 

Tá. Tá plé déanta ag ESB Networks leis an gCoimisiún um Rialáil Fóntas, leis an Roinn Comhshaoil, Aeráide agus Cumarsáide agus leis an gCoimisiún um Chosaint Sonraí maidir le gnéithe den Chlár a bhaineann le príobháideacht sonraí. Tá réimse cuimsitheach de mheasúnuithe tionchair ar chosaint sonraí déanta agus foilsithe againn. Sna measúnuithe sin, tugtar le fios an chaoi a ndéanann ESB Networks na sonraí pearsanta a bhailíonn méadair chliste a bhailiú, a phróiseáil agus a chosaint. Tá na measúnuithe tionchair ar chosaint sonraí seo ar fáil lena léamh  anseo. 

Fógraíodh cinneadh an gCoimisiúin um Rialáil Fóntas go gcuirfí méadrú cliste i bhfeidhm do gach custaiméir baile agus gnóthais bhig den chéad uair in Iúil 2012. Rinneadh an cinneadh tar éis tabhairt faoi thrialacha cuimsitheacha teicneolaíochta agus iompraíochta custaiméirí agus anailís dhearfach costais is tairbhe de réir mar a dhéantar foráil ina leith sa Treoir maidir le hÉifeachtúlacht Fuinnimh (agus arís sa tríú pacáiste fuinnimh). Leag Rialacháin an Aontais Eorpaigh (Éifeachtúlacht Fuinnimh, leis an Treoir maidir le hÉifeachtúlacht Fuinnimh a chur chun feidhme) an fhreagracht ar an gCoimisiún um Rialáil Fóntas as méadrú cliste a chur chun feidhme in Éirinn. Chuir an Coimisiún an Ceapadh ar Ardleibhéal don chlár náisiúnta um méadrú cliste i gcrích i nDeireadh Fómhair 2014 mar aon leis na cinntí mionsonraithe beartais a bheadh ag teastáil chun éifeacht phraiticiúil a thabhairt don Cheapadh sin ar Ardleibhéal in 2016.

Caithfidh méadair chliste sonraí pearsanta a bhailiú agus caithfidh ESB Networks na sonraí sin a phróiseáil chun méid áirithe oibleagáidí dlíthiúla a shásamh mar atá leagtha ar ESB Networks mar gheall ar a Cheadúnas Oibreora Córais Dáileacháin. Tá oibleagáidí ar ESB Networks faoi Choinníoll 7 (Goid leictreachais a bhrath agus a chosc), Coinníoll 8 (Seirbhís chun Méadarphointe a chlárú agus Comhaontú Cláraithe Méadair) agus Coinníoll 9 (Soláthar seirbhísí méadraithe agus sonraí). 

In Iúil 2020, chinn an Coimisiún um Rialáil Fóntas, de bhun Choinníoll 9(2) den Cheadúnas Oibreora Córais Dáileacháin, go bhfuil na gníomhartha seo a leanas faoi raon feidhme na n-oibleagáidí a fhorchuirtear ar ESB Networks de réir Choinníoll 9. 

• Gach córas méadraithe chliste a shuiteáiltear a ríomhchlárú chun na nithe seo a thaifeadadh (iompórtáil agus easpórtáil) (i) sonraí eatraimh gach leathuair an chloig (ii) léamha tabhaill lae, oíche agus tréimhsí buaicéilimh gach ceithre huaire is fiche (iii) sonraí ionstraimíochta agus (iv) sonraí teagmhais méadair ó chórais mar sin.
  . 

Chinn an Coimisiún chomh maith gur chóir do ESB Networks, faoi réir tuilleadh treorach, na sonraí thuasluaite a phróiseáil do na críocha seo a leanas amháin: 

• leanúint ar aghaidh chun an ceapadh ar ardleibhéal a chur i bhfeidhm le go sásófar riachtanais an chláir agus na hoibleagáidí a thiocfaidh as an bpacáiste “Fuinneamh Glan do gach Eorpach”, i gcomhréir leis an gCinneadh agus le Coinníoll 9 den Cheadúnas Oibreora Córais Dáileacháin (DSO); 
• an tArd-Infreastruchtúr Méadraithe (AMI) a bhunú agus a choimisiúnú chun tacú le feidhmiú an chláir;. 
• an tArd-Infreastruchtúr Méadraithe a fheidhmiú sa dóigh is go mbeifear in ann seirbhísí cliste a sholáthar don mhargadh miondíola leictreachais. (taraifí ama úsáide ina measc) mar a thugtar sna próisis a bhaineann leis an margadh miondíola leictreachais mar a nuashonraíodh le scéimre Leagan 13; agus 
• oibleagáidí atá cheana ann a chomhlíonadh faoi Choinníoll 9. 
  

Tá tuilleadh sonraí le fáil inár measúnuithe tionchair ar chosaint sonraí atá le fáil anseo